మత్తుకు దూరం.. విజ్ఞానానికి చేరువ! ~”నషా ముక్త్ భారత్’’పై విద్యార్థులకు అవగాహన.         

మత్తుకు దూరం.. విజ్ఞానానికి చేరువ!

~ ”నషా ముక్త్ భారత్’’పై విద్యార్థులకు అవగాహన.           

~ భీమవరం–ఢిల్లీ సైకిల్ యాత్రికురాలు డా.విజయలక్ష్మికి ఘన సన్మానం.              ఆర్మూర్(తెలంగాణ ఫోకస్ -పొన్నాల) నవంబర్ 14:  యువత మత్తు పదార్థాలకు బానిసై బంగారు భవిష్యత్తును నాశనం చేసుకోవద్దని, క్రీడలు మరియు విద్యపై మక్కువ పెంచుకుని దేశాభివృద్ధిలో భాగస్వాములు కావాలని వక్తలు పిలుపునిచ్చారు. ఆర్మూర్ పట్టణంలోని సోషల్ వెల్ఫేర్ డిగ్రీ కళాశాలలో శనివారం ‘నషా ముక్త్ భారత్’ (వ్యసన రహిత భారత్) అంశంపై విద్యార్థులకు ప్రత్యేక అవగాహన సదస్సు నిర్వహించారు. నగర సంఘ చాలక్ పోల్కం నారాయణ ఆధ్వర్యంలో ఈ కార్యక్రమం జరిగింది.                                                 మత్తు పదార్థాలు కుటుంబాలను ఛిన్నాభిన్నం చేస్తాయి:

ఈ సందర్భంగా వక్తలు మాట్లాడుతూ.. పొగాకు ఉత్పత్తులు, ఇతర మత్తు పదార్థాలను దేశం నుంచి తరిమికొట్టాల్సిన బాధ్యత యువతపై ఉందన్నారు. మత్తు తాత్కాలిక గమ్మత్తుగా అనిపించినా, అది వ్యక్తి జీవితాన్ని, కుటుంబాలను కోలుకోలేని విధంగా నాశనం చేస్తుందని హెచ్చరించారు. విద్యార్థులు ర్యాగింగ్ వంటి దుశ్చర్యలకు దూరంగా ఉంటూ, శారీరక దృఢత్వాన్ని పెంపొందించే క్రీడల వైపు దృష్టి సారించాలని సూచించారు.

సైకిల్ యాత్రికురాలి స్ఫూర్తిదాయక సందేశం:

‘నషా ముక్త్ భారత్’ నినాదంతో ఆంధ్రప్రదేశ్‌లోని భీమవరం నుంచి దేశ రాజధాని ఢిల్లీ వరకు సాహసోపేత సైకిల్ యాత్ర చేస్తున్న డాక్టర్ ఇందుకూరి విజయలక్ష్మి ఈ సదస్సుకు ముఖ్య అతిథిగా హాజరయ్యారు. తన సుదీర్ఘ సైకిల్ యాత్ర అనుభవాలను విద్యార్థులతో పంచుకుంటూ, మత్తు రహిత సమాజ నిర్మాణం ఆవశ్యకతను వివరించారు. ఈ సందర్భంగా నిర్వాహకులు, విద్యార్థులు డాక్టర్ విజయలక్ష్మిని శాలువాతో ఘనంగా సత్కరించారు. ఆమె ఢిల్లీ యాత్ర ఎలాంటి ఆటంకాలు లేకుండా విజయవంతం కావాలని హృదయపూర్వక అభినందనలు తెలిపారు. ఈ కార్యక్రమంలో “షీ” టీం పోలీస్ అధికారులు విగ్నేష్, జిల్లా కార్యదర్శి గాజుల దయానంద్, జిల్లా విశేష సంపర్క ప్రముఖ్ అల్లపూర్ అక్షయ్, ఆర్మీ జవాన్ లింగంపల్లి వేదాంత్ (సన్నీ), నగర ఉపాధ్యక్షులు గంజాల ప్రేమ్, సురక్ష ప్రముఖ్ ప్రవీణ్, సత్సంగ్ ప్రముఖ్ యోగేష్, బలోపాసన ప్రముఖ్ సాయి, బజరంగ్ రిషి, బజరంగ్ దళ్ కార్యకర్తలు మరియు కళాశాల విద్యార్థులు పెద్ద సంఖ్యలో పాల్గొన్నారు.